کۆڵانی ھه‌ژار
کۆڵانی ھه‌ژار
عه‌بدولعه‌زیز که‌ره‌می – سنه
کۆڵانه‌که‌مان
نوقمی گریانه و
په‌له‌قاژه‌ی ھه‌نسک
سک ئاسمان ئه‌دڕێ،
شه‌و نیه قیژه‌ی برسی لە کۆڵان
پێوه‌ره نه‌کات ویژدانی ژیان ،
شه‌و نیه تاسه‌ی خۆزگه نه بارێ
که‌ی تیمار بکه‌م زامی ھه‌ژارێ،
کۆڵانه‌که‌مان
سه‌ر ڕێژی ئاخه و
وه‌نه‌وز له خۆزگه
چورتێکیش نادات،
کوڵی کڵۆڵی پوچی ئاوە کوڵ
شه‌و نیه پلووسکی گه‌رۆم دانه‌دڕێ
خه فه‌ت نه‌م چزنێ و
له باری قورسی نا له‌باریما
ھه‌واڵ نه‌پرسێ،
کۆڵانه‌که‌مان
زوقم ژه‌ندوویه،
چراکان بێ تینن
سه‌ھۆڵ گرتوویه،
بۆنی تریاقی که‌لاک ئه‌گه‌وجێ
لووتم ژنگ ئه‌با و
گه‌رۆم ئه‌کۆکێ،
کۆڵانه‌که‌مان
ته‌نیا بۆنه‌که‌ی، له خۆڵه‌مێشه
ده‌ستی ھه‌تیوێ
ئاوپرزێنیه‌کا
تاکوو، ئه‌و بۆنه‌ی ، شه‌ویان نه‌مێنێ،
سووچی دیواری کۆڵانه‌که‌مان ،
سپی ئه‌نوێنێ،
وه‌ک شۆره‌کاتی لووتکه‌ی ئاوایی،
ئه‌لێی سه‌د مه‌ڕی برسی له‌ستوویه،
کۆڵانه‌که‌مان
مه‌ڕی لێ نیه
ئه‌و دیوارانه ، ھه‌ژار گه‌ستوویه.
عه‌بدولعه‌زیز که‌ره‌می – سنه
3/6/90ی ھه‌تاوی