معماری
خانه ---> به شی کوردی ---> ڕه‌مه‌زان ---> کورته‌یه‌ك له‌سه‌ر ڕۆژووی مانگی ڕه

کورته‌یه‌ك له‌سه‌ر ڕۆژووی مانگی ڕه

کورته‌یه‌ك له‌سه‌ر ڕۆژووی مانگی ڕه‌مه‌زان

 مه‌لا عومه‌ر-خوێندکاری ماسته‌ر/به‌ریتانیا

  (يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ)

مانگی ڕه‌مه‌زان مانگی لێخۆشبوون و به‌خۆداچوونه‌وه‌و ته‌وبه‌کردن و چاکه‌ کردنه‌، مانگێکی پیرۆزه‌و گه‌وره‌ترین کار تێیدا ڕوویداوه‌ که‌ ئه‌ویش هاتنه‌ خواره‌وه‌ی قورئانی پیرۆزه‌، ئه‌و قورئانه‌ی که‌وا خوای گه‌وره‌ کردی به‌ دواهه‌مین کتێب بۆ هه‌موو مرۆڤایه‌تی تا ڕۆژی دوایی، ئه‌و قورئانه‌ی که‌ مایه‌ی دڵخۆشی و شانازی هه‌موو مسوڵمانێکه‌و،وه‌‌ هۆی ڕێنموونی و ته‌حه‌دای هه‌موو لایه‌که‌. ئه‌و مانگی ڕه‌مه‌زانه‌ی که‌ هه‌موو مسوڵمانان به‌یه‌ك ده‌نگ و به‌یه‌ك جۆر تێیدا به‌ڕۆژوو ده‌بن له‌ سه‌رانسه‌ری جیهاندا. باسکردن له‌ پیرۆزی و تایبه‌تمه‌ندیه‌کانی ئه‌م مانگه‌ زۆرن لێره‌دا به‌جێی ده‌هێڵین و ده‌ڕۆینه‌ ناو چۆنێتی ڕۆژوو گرتنه‌وه‌و ئه‌و کارانه‌ی که‌ په‌یوه‌ندیان به‌م کرداره‌ پیرۆزو به‌ به‌ره‌که‌ته‌وه‌ هه‌یه‌.

 

ڕۆژووی مانگی ڕه‌مه‌زان وه‌ك هه‌ر کردارێکی تری ئاینی کۆمه‌ڵێك تایبه‌تمه‌ندی خۆی هه‌یه‌. هه‌موو مسوڵمانێك پێویسته‌ له‌سه‌ری که‌ به‌رچاو ڕوونیه‌کی له‌سه‌ر ئه‌م مانگه‌و وه‌ چۆنێتی ڕۆژوو گرتن هه‌بێت بۆ ئه‌وه‌ی کاره‌کانی به‌ پێی ئه‌وه‌ بێت که‌ خوای گه‌وره‌ داوای کردووه‌. ڕۆژووی مانگی ڕه‌مه‌زان  یه‌کێکه‌ له‌ پێنج پایه‌کانی ئیسلام وه‌ك له‌ فه‌رمووده‌ی ( بنی الاسلام علی خمس )  دا هاتووه‌ وه‌ باسی ڕۆژووشی تێدا کردووه‌. وه‌ کۆمه‌ڵی زانایانیش هاوڕان له‌سه‌ر واجبێتی گرتنی ئه‌م مانگه‌ .

ڕۆژوو

ڕۆژوو له‌ زمانه‌وانیدا واته‌: خۆ گرتنه‌وه‌ له‌ شت وه‌ك خوای گه‌وره‌ ده‌فه‌رمووی له‌باسی مه‌ریه‌مدا سه‌لامی خوای لێ بێت (انی نذرت للرحمن صوما)  به‌ڵام ڕۆژوو گرتنه‌که‌ی مه‌ریه‌م سه‌لامی خوای لێ بێت به‌ قسه‌ نه‌کردن بوو، لێره‌دا مه‌به‌ست ووشه‌ی (صوم) که‌ به‌واتای له‌ خۆ گرتنه‌وه‌ دێت له‌ شه‌رعدا یانی له‌ خۆ گرتنه‌وه‌یه‌کی تایبه‌ت له‌ که‌سێکی تایبه‌ت له‌ کاتێکی تایبه‌تدا به‌ مه‌رج. وه‌ڕۆژوو واجب بووه‌ به‌ پێی قورئان وفه‌رمووده‌و کۆڕه‌وی زانایان، وه‌ کاته‌که‌شی به‌ بینینی مانگه‌ له‌ ڕه‌مه‌زاندا وه‌ك ده‌فه‌رمووێ ( فَمَنْ شَهِدَ مِنْكُمُ الشَّهْرَ فَلْيَصُمْهُ ) 

 

مه‌رجه‌کانی واجب بوونی ڕۆژوو

 

سێ مه‌رج هه‌یه‌ بۆ واجب بوونی ڕۆژوو:

1- ئیسلام واته‌ بێ باوه‌ڕ ڕۆژووی له‌سه‌ر واجب نیه‌ ئه‌مه‌ کارێکه‌ په‌یوه‌ندی به‌ مسوڵمانه‌وه‌ هه‌یه‌ ئه‌گه‌ر بێ باوه‌ڕ ڕۆژووش بگرێت بۆی حسێب ناکرێت وه‌ هیچ پاداشتێکی له‌سه‌ر وه‌رناگرێت، چونکه‌ مسوڵمان که‌ ڕۆژوو ده‌گرێت له‌به‌ر خوا ده‌یگرێت، به‌ڵام بێ باوه‌ڕ له‌به‌ر چ.

 

 2- گه‌وره‌ (بالغ) واته‌ له‌سه‌ر منداڵ واجب نیه‌ ئه‌مه‌ش مانای وانی یه‌ منداڵ بۆی نیه‌ بیگرێت وه‌یان پاداشتی له‌سه‌ر وه‌رناگرێت بێگومان نه‌خێر، باشتر وایه‌ منداڵانیش له‌سه‌ر ئه‌م کرداره‌ پیرۆزه‌ ڕابهێنرێت بۆ ئه‌وه‌ی که‌ گه‌وره‌ بوو له‌سه‌ری ئاسان بێت، وه‌ هه‌روه‌ها خوای گه‌وره‌ بۆشی حسێب ده‌کات وه‌هه‌موو کرده‌وه‌یه‌کی چاکی تر، ده‌بێت ئه‌وه‌مان له‌بیر بێت زۆر جار زۆرکه‌س به‌هه‌ڵه‌دا ده‌چن له‌سه‌ر ئه‌م خاڵه‌ واته‌ بالغ بوون، بالغ بوونی شه‌رعی ئه‌وه‌یه‌ ئه‌گه‌ر ئافره‌ت بوو سه‌ره‌تای که‌وتنه‌ حه‌یزه‌وه‌یه‌ وه‌ پیاویش ئیحتیلام بوون، ئیتر هه‌ر شتێکی تر که‌ بۆ منداڵ بوون دیاری کراوه‌ له‌هه‌ر قانون و دین و که‌لتورێکی تردا پێوه‌ر نیه‌ بۆ ئه‌م کاره‌ بۆ نمونه‌ له‌ ئه‌وروپادا تا ته‌مه‌نی 18 ساڵ هه‌ر به‌ منداڵ داده‌نرێت وه‌ ده‌کرێت له‌ته‌مه‌نی 18 ساڵیدا چ کچ وه‌ کوڕ چه‌ند ساڵێك به‌سه‌ر بالغ بوونیدا تێپه‌ڕی بوو بێت.

 

3- ژیری (العقل) وه‌ ژیری پێویسته‌ هه‌بێت بۆ ئه‌وه‌ی بزانێت چ ده‌کات، شێت هیچ ته‌کلیفێکی شه‌رعی له‌سه‌ر نیه‌ وه‌ك پێغه‌مبه‌ر درودی خوای لێ بێت ده‌فه‌رمووێ  (عن النبي ‏ ‏صلى الله عليه وسلم ‏ ‏قال ‏ ‏رفع القلم عن ثلاث عن النائم حتى يستيقظ وعن الصغير حتى يكبر وعن المجنون حتى يعقل ‏ ‏أو يفيق)  له‌ پێغه‌مبه‌ره‌وه‌ درودی خوای لێ بێت هاتووه‌، ده‌فه‌رمووێ قه‌ڵه‌می تاوان له‌سه‌ر سێ کۆمه‌ڵ لابراوه‌ خه‌وتوو تا هه‌ڵده‌ستێت، منداڵ تا گه‌وره‌ ده‌بێت، شێت تا ژیر ده‌بێت یان چاك ده‌بێته‌وه‌. که‌واته‌ که‌سێك ڕۆژووی له‌سه‌ واجبه‌ که‌ مسوڵمان و گه‌وره‌و ژیر بێت.

 

فه‌رزه‌کانی ڕۆژوو

 

فه‌رزه‌کانی ڕۆژوو پێنجن:

 1- نیه‌ت هێنانه، نیه‌ت هێنانیش ته‌نها دڵ به‌سه‌ بۆ کردنی ئه‌م کاره‌ وه‌ جێگه‌ی ڕاسته‌قینه‌ی نیه‌ت دڵه‌، زۆر به‌داخه‌وه‌ هێشتا زۆر که‌س ناتوانێت ئه‌مه‌ هه‌زم بکات و هه‌ر نکۆڵی لێده‌کات و وه‌ زۆر موسیره‌ له‌سه‌ر ووتنی به‌ده‌م، لێره‌دا ئێمه‌ قسه‌مان له‌سه‌ر ئه‌وه‌ نیه‌ که‌ ووتنی به‌ده‌م ڕه‌وا نیه‌، به‌ڵکو ئاساییه‌ به‌ڵام ئه‌گه‌ر به‌ ووته‌ش نه‌وترا زۆر ئاساییه‌ مادام نیه‌ته‌که‌ هه‌بوو بێت له‌ دڵدا. هه‌ر کردارێك که‌ ده‌کرێت بێ گومان خوای گه‌وره‌ ئاگاداره‌ به‌ نیه‌ته‌که‌ت خۆ ئه‌گه‌ر به‌ ووته‌ بڵێی خوایه‌ من به‌یانی به‌ڕۆژوو ده‌بم له‌به‌ر تۆ به‌ڵام له‌ دڵتا ئه‌وه‌ت مه‌به‌ست نه‌بوو بێگومان خوای گه‌وره‌ سه‌یری دڵ ده‌کات، وه‌ك له‌ فه‌رمووده‌ی پێغه‌مبه‌ریشدا هاتووه‌ که‌ خوای گه‌وره‌ نه‌ سه‌یری جه‌سته‌ نه‌ شێوه‌و ڕوخسارمان ده‌کات به‌ڵکو سه‌یری دڵ و کرده‌وه‌مان ده‌کات، وه‌ دڵ گرنگیه‌کی ئه‌وتۆی هه‌یه‌ له‌ شه‌رعدا، جا ده‌بێت نیه‌تمان هه‌بێت بۆ کردنی ئه‌م کاره‌ له‌ کاتی خۆیدا ئه‌ویش پێش سبه‌ینیانه‌ وه‌ ده‌کرێت هه‌ر له‌سه‌رتایی مانگه‌وه‌ نیه‌تمان هه‌بێت بۆ کردنی ئه‌م کاره‌ پیرۆزه‌ ئه‌ویش هه‌ر به‌ بوونی ئه‌و کاره‌ له‌ دڵماندا.

 

2- خۆ گرتنه‌وه‌ له‌ خواردن و 3- خواردنه‌وه‌، نابێت به‌ هیچ شێوه‌یه‌ک خواردن و خواردنه‌وه‌ له‌ ڕۆژی ڕه‌مه‌زاندا بخورێت به‌ خواردنی یان خواردنه‌وه‌ی هه‌ر شتێك ئه‌گه‌ر که‌م وه‌یان بچوکیش بێت ڕۆژووه‌که‌ی پێ ده‌شکێت و دروست نابێت مه‌گه‌ر له‌بیری نه‌بێت که‌ به‌ ڕۆژووه‌، جا ئه‌گه‌ر له‌ بیری نه‌بوو وه‌ شتێکی خوارد زیان به‌ ڕۆژووه‌که‌ی ناگات چونکه‌ ویستی ئه‌وه‌ نه‌بووه‌ ڕۆژووه‌که‌ی بشکێنێ، وه‌ك له‌ فه‌رمووده‌یه‌کدا هاتووه‌ ( من نسی وهو صائم فاكل أو شرب فلیتم صومه‌ فانما أطعمه‌ الله‌ وسقاه‌)   واته‌ ئه‌گه‌ر یه‌کێك له‌ بیری چوو که‌ به‌ڕۆژووه‌ شتی خوار وه‌یان خواردیه‌وه‌ با به‌رده‌وام بێت له‌سه‌ر ڕۆژووه‌که‌ی ئه‌وه‌ خوای گه‌وره‌ خواردن یان خواردنه‌وه‌ی پێداوه‌. به‌ڕاستی ئه‌مه‌ واقعێتی ئیسلام جێگیر ده‌کات. ئه‌گه‌ر شتیك که‌ ده‌سته‌ڵاتی تیا نه‌بێت ڕۆژوو ناشكێنی وه‌ك دوکه‌ڵی کارگه‌و ته‌پوتۆزو ئه‌و شتانه‌، به‌ڵام دوکه‌ڵی جگه‌ره‌ی جگه‌ره‌ کێش ڕۆژووه‌که‌ی ده‌شکێنی چونکه‌ به‌ ئاره‌زووی خۆی بووه‌ نه‌ك ناچاری.

 

4- کاری جووت بوون (الجماع) ڕۆژانی ڕه‌مه‌زان کاتی خوا په‌رستیه‌و نابێت کاری جووت بونی تێدا ئه‌نجام بدرێت، وه‌ ئه‌گه‌ر ئه‌و کاره‌ کرا ڕۆژووه‌که‌ ده‌شکێ و وه‌ کافه‌ره‌تیشی ده‌که‌وێته‌سه‌ر ئه‌ویش ئازاد کردنی به‌نده‌یه‌ گه‌ر نه‌بوو دوومانگ له‌سه‌ر یه‌ك به‌ ڕۆژوو بوونه‌ ئه‌گه‌ر نه‌توانرا دانی خواردنه‌ به‌ 60 هه‌ژارو که‌م ده‌رامه‌ت. وه‌  هه‌ر کارێکی تر بۆ خۆ ڕه‌حه‌ت کردن بۆ نمونه‌ به‌ده‌ست ..تاد ڕۆژوه‌که‌ ده‌شکێنێ. وه‌ ئه‌گه‌ر له‌ بیرت چوو که‌ به‌ ڕۆژووی هه‌مان حوکمی خواردن و خواردنه‌وه‌ی هه‌یه‌ واته‌ ناشکی خوای گه‌وره‌ زاناتره‌ .

 

5- خۆ ڕشانه‌وه‌ به‌ زۆر ده‌بێت ئاگاداری لێ بکرێت و به‌زۆر خۆت نه‌ڕشێنیته‌وه‌. وه‌ هه‌روه‌ها زانینی ڕۆژ چ له‌ سه‌ره‌تاوه‌ وه‌یان له‌ کۆتاییه‌وه‌، ده‌بێت ئاگاداری ئه‌وه‌ بکرێت که‌ خۆت بگریته‌وه‌ له‌ هه‌موو ئه‌و شتانه‌ پێش ڕۆژ هه‌ڵاتن تا ڕۆژئاوا بوون خۆ ئه‌گه‌ر به‌که‌مێکیش بێت ڕۆژووه‌که‌ دروست نابێت یانی به‌ هه‌ڵاتنی ڕۆژ وه‌یان به‌ ئاوا نه‌بوونی.

 

ئه‌و شتانه‌ی که‌ ڕۆژوو ده‌شکێنن

 

ئه‌وشتانه‌ی که‌ ڕۆژوو ده‌شکێنن 10 شتن:

1-هه‌رشتێك به‌ ئه‌نقه‌ستی بگاته‌ بۆشایی بۆ نمونه‌ زگ.

2-هه‌رشتێك به‌ ئه‌نقه‌ست بڕواته‌ ناو بۆشایی سه‌ر وه‌ك لووت گوێ.

3-شت خستنه‌ ناو بۆشایی دواوه‌ یان پێشه‌وه‌، وه‌ك ده‌رمان و ئه‌و جۆره‌ شتانه‌، وه‌ هه‌روه‌ها په‌نجه‌ تێنانیش ده‌گرێته‌وه‌.

4-خۆ ڕشانه‌وه‌ به‌ ئه‌نقه‌ست، به‌ڵام ئه‌گه‌ر بۆخۆی ڕشایه‌وه‌ ناشکێ.

5-کاری جووت بوون.

6-خۆ ڕه‌حه‌ت کردن چ خۆی بۆ خۆی بێت یان که‌سێکی تر بێت.

7-خوێنی زه‌یستانی ئافره‌ت، واته‌ سوڕی مانگانه‌.

8-خوێنی نیفاس ئه‌و خوێنه‌ی دوایی منداڵ بوون دێت.

9-شێت بوون، ئه‌گه‌ر بۆ ماوه‌یه‌کی که‌میش بێت.

10-هه‌ڵگه‌ڕانه‌وه‌ له‌ دین خوا په‌نامان بدات''. 

11- نیه‌ت گۆڕین، وه‌ك یه‌کێ بڵێ ڕۆژوه‌که‌م ده‌شکێنم یان پاش که‌مێکی تر ده‌یشکێنم یان با بزانم چۆن ده‌بێت. له‌م جۆره‌ قسانه‌ وه‌ هۆی شکاندی به‌ نیه‌تگۆڕین با هیچیشی نه‌خواردبێ هه‌ر ده‌شکێ. جا ده‌بێت متمانه‌ی ته‌واو ببێت به‌ خۆو ئه‌و جۆره‌ دوودڵیانه‌ دروست نه‌کات له‌ خۆیدا.

 

هه‌ندێك ئادابی باش له‌ ده‌رباره‌ی ڕۆژوو له‌ ڕه‌مه‌زاندا

 

کارێكی باشه‌ ڕۆژووه‌وان ئاگای له‌م ڕه‌وشانه‌ بێت له‌ ڕۆژوودا

1-پارشێوکردن، کارێکی باشه‌و بکرێت به‌ڵام تاوانی نیه‌ ئه‌گه‌ر نه‌شکرێت کردنی باشه‌و سونه‌تی پێغه‌مبه‌ره‌ وه‌ك ده‌فه‌رمووێ (تسحروا فاءن السحور برکة)  واته‌ پارشێو بکه‌ن چونکه‌ به‌ره‌که‌تی تیایه‌ وه‌ هۆی به‌ره‌که‌ته‌که‌شی ئه‌وه‌یه‌ ڕۆژووه‌وان به‌هێز ده‌کات''  

 

2-په‌له‌کردن له‌ ڕۆژوو شکاندندا هه‌رکه‌ دڵنیا بوویت که‌ ڕۆژ ئاوا بووه‌، وه‌ هه‌روه‌ها هه‌وڵ بدرێت که‌ به‌ چه‌ند ده‌نکه‌ خورمایه‌کی ته‌ڕ ڕۆژووه‌که‌ بشکێنرێت، وه‌گه‌ر نه‌بوو به‌ ئاو.

 

3-دوعاو پاڕانه‌وه‌ له‌کاتی به‌ربانگدا پێغه‌مبه‌ر درودی خوای لێ بێت ده‌فه‌رمووێ ( ثلاثة لاترد دعوتهم الصائم حتێ یفطر، والاءمام العادل، والمظلوم)  واته‌ سێ که‌س یان کۆمه‌ڵ خوای گه‌وره‌ داواکانیان ره‌د ناکاته‌وه‌ یه‌که‌میان ڕۆژووه‌وان دووه‌میان سه‌رۆکێکی عادل وه‌ سێهه‌میان که‌سێکی سته‌م لێکراو.

 

4-خۆگرتنه‌وه‌ له‌ هه‌موو شتێکی پڕو پوچ وه‌ك زه‌می خه‌ڵك کردن و باسی ئه‌م وئه‌و، کات کوشتن به‌شتی بێ به‌هاوه‌، چونکه‌ ئه‌م مانگه‌ مانگێکه‌ فرسه‌تێکی زێڕینه‌ بۆ عیباده‌ت کردن و کۆکردنه‌وه‌ی زه‌خیره‌ بۆ دواڕۆژ وه‌ هه‌رکارێك له‌م ڕۆژانه‌دا ده‌کرێت بێگومان خێری زیاتره‌ له‌ له‌ ڕۆژانی تر. پێغه‌مبه‌ر درودی خوای لێ بێت ده‌فه‌رمووێ ( رب صائم لیس له‌ من صیامه‌ الا الجوع )  واته‌ ڕۆژووه‌وانی وا هه‌یه‌ جگه‌ له‌ برسێتی هیچی بۆ نامێنێته‌وه‌.

 

5- سیواك کردن6-قورئان خوێندن، و ئاماده‌بوونی کۆڕی زیکرو یادکردنی خوا خۆ مه‌شغوڵ کردن به‌ تێگه‌یشتنمان له‌ ئیسلام زیاتر، وه‌ ئێسته‌ به‌ هۆی ئه‌م ته‌کنه‌لۆجیای له‌ به‌رده‌ستماندایه‌ ده‌توانین زیاتر سودمه‌ند بین ئه‌و هه‌موو سایته‌ هه‌یه‌ که‌ کاری ئیسلامی بڵاو ده‌کاته‌وه‌ سایتی واهه‌یه‌ به‌ هه‌زاره‌ها ووتارو ده‌رسی تێدایه‌ جگه‌ له‌و هه‌موو کتێب و مه‌قالانه‌ی که‌ به‌رده‌وام داده‌به‌زن.

 

7-هه‌وڵدانی زیاتر له‌ ده‌ ڕۆژی کۆتایی مانگی ڕه‌مه‌زاندا که‌ شه‌وی به‌ فه‌ریشی تێ ده‌که‌ویت (القدر) وه‌ پێغه‌مبه‌ر درودی خوای لێ بێت خۆی گرنگیه‌کی زۆری به‌م ڕۆژانه‌ داوه‌ له‌گه‌ڵ عائیله‌که‌یدا وه‌ك ده‌فه‌رمووێ (کان اذا دخل العشر الاواخر احي اللیل، وایقظ اهله‌، وشد المئزر) 

 

پێنج ڕۆژ هه‌ن که‌ دروست نیه‌ ڕۆژوویان تێدا بگیرێت هه‌ردوو جه‌ژنه‌که‌و وه‌ سێ ڕۆژی دوایی جه‌ژنی قوربان، وه‌ ڕۆژووی به‌ گومانیش دروست نیه‌ که‌ به‌ یوم الشك ناسراوه‌ ئه‌وه‌یه‌ که‌ ڕوون نیه‌ ئایه‌ ڕه‌مه‌زانه‌ یان نه‌، ته‌نها بۆ ئه‌و که‌سانه‌ نه‌بیت که‌ خویان گرتووه‌ به‌ڕۆژووه‌وه‌ وه‌ ئه‌و ڕۆژه‌ش ده‌که‌ویته‌ ئه‌و کاته‌ی که خوی پێوه‌ گیراوه‌ بۆ نمونه‌ که‌سێك عاده‌تی وایه‌ هه‌موو ڕۆژی دووشه‌ممه‌و پێنج شه‌ممه‌یه‌ك به‌ ڕۆژوو بێت وه‌ ڕۆژی یوم الشکیش بکه‌وێته‌ دووشه‌ممه‌ یان پێنج شه‌ممه‌وه‌، ده‌بێت ئه‌وه‌ش بزانین که‌ ئه‌و که‌سه‌ی وه‌ك خو ئه‌م ڕۆژه‌ ده‌گرێت نیه‌تی ڕه‌مه‌زانی لێ ناهێنێ.

 

وه‌ ئه‌وکه‌سانه‌ی که‌ له‌ سه‌فه‌ردان سه‌فه‌رێکی دوورو درێژ بۆیان هه‌یه‌ بۆ ڕۆژوو نه‌بن وه‌ کاتێکی تر بیگرنه‌وه‌، وه‌که‌سێك که‌ نه‌خۆش بێت هه‌روه‌ها، وه‌که‌سێك که‌ زۆر پیر بووه‌و توانی ڕۆژووی نه‌ماوه‌ ده‌توانێت بۆ هه‌ر ڕۆژێك که‌فاره‌ته‌که‌ی ده‌دات، وه‌ ئه‌وکه‌سانه‌ی که‌ دووگیانن وه‌یان شیر ده‌رن ده‌توانن به‌ڕۆژوو نه‌بن له‌ دواتر دا بیگرنه‌وه‌ لێره‌دا جیاوازیه‌ك هه‌یه‌ له‌وه‌ی ئه‌گه‌ر ئافره‌ته‌که‌ له‌ خۆی ترسا له‌ ڕۆژوو شکاندنه‌که‌ی ته‌نها ڕۆژووه‌که‌ ده‌گرێته‌وه‌ وه‌ئه‌گه‌ر له‌ منداڵه‌که‌ی ترسا ئه‌وکاته‌ ڕۆژوو وه‌هه‌م که‌فاره‌تیشی ده‌که‌وێته‌ سه‌ر''

 

وه‌ ته‌نها ئه‌م فه‌رمووده‌ به‌سه‌ بۆ دڵخۆشمان به‌ گرتنی مانگی ڕه‌مه‌زان و گرتنی شه‌وی قه‌در

‏ (عن النبي ‏ ‏صلى الله عليه وسلم ‏ ‏قال ‏ ‏من قام ليلة القدر إيمانا واحتسابا غفر له ما تقدم من ذنبه ومن صام رمضان إيمانا واحتسابا غفر له ما تقدم من ذنبه)   ئه‌وی شه‌وی قه‌در بکاته‌وه‌ به‌ عیباده‌ت به‌ ئیمانه‌وه‌ خوای گه‌وره‌ له‌ هه‌موو گوناهه‌کانی ڕابووردووی خۆش ده‌بێت وه‌هه‌روه‌ها  تقدم من ذنبه

ڕۆژووی مانگی ڕه‌مه‌زانیش. وه‌ داواکارم له‌ خوای گه‌وره‌ ئه‌م ڕه‌مه‌زانه‌ بکاته‌ مایه‌ی پاك بوونه‌وه‌مان له‌ هه‌موو تاوانه‌کان.ئه‌مه‌ ته‌نها کورته‌یه‌کی زۆر که‌م بوو له‌سه‌ر ڕۆژوو وه‌ ده‌بێت ئه‌وه‌ بزانین بۆ هه‌موو ئه‌و ووتانه‌ی سه‌ره‌وه‌ ئایه‌ت و فه‌رمووده‌ی زۆر هه‌ن بۆ ئه‌وه‌ی نوسینه‌که‌ کورت بکه‌مه‌وه‌ ئاماژه‌م پێنه‌کردووه‌، چونکه‌ به‌رده‌وام هاوڕێکانم داوام لێده‌که‌ن با نوسینه‌کانت کورت بێت له‌به‌ر ئه‌وه‌ تاقه‌تیان نیه‌ نوسینی درێژ بخوێننه‌وه. وه‌ ده‌بێت ئه‌وه‌ بزانین که‌ چوارده‌ جۆر ڕۆژوومان هه‌یه‌ هه‌شتیان له‌ قورئاندا باس کراوه‌ وه‌ شه‌شیشیان له‌ سونه‌تدا'' ، ئێمه‌ ته‌نها باسی ڕۆژووی مانگی ڕه‌مه‌زانمان کرد.‌

 

ماوه‌ته‌وه‌ بڵێم خوای گه‌وره‌ ته‌مه‌نمان پێ ببه‌خشی تا له‌ خێری ئه‌م ڕه‌مه‌زانه‌شدا به‌شدار بین و وه‌ ئه‌م ڕه‌مه‌زانه‌ ببێته‌ مایه‌ی لێخۆشبوونمان و وه‌لابردنی هه‌موو ئه‌و گرفتانه‌ که‌ داڵده‌ی ووڵاتانی ئیسلامی داوه‌.

سه رچاوه : یه‌كگرتوو

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

پاسخ دادن معادله امنیتی الزامی است . *

تلگرام نوگرا »»» مطالب سایت + عکس + کلیپ + نوشته های کوتاه متنوع + با ما همراه باشید . eslahe@

قالب وردپرس