پێشەوای ئیمانداران ، عومەری کوڕی خەتاب، چه خۆزگەیەکی هەبوو؟
پێشەوای ئیمانداران ، عومەری کوڕی خەتاب، چه خۆزگەیەکی هەبوو؟
ڕڕۆژێکیان عومەری کوڕی خەتاب (خودا لێ‌ی ڕازی بێت) لەگەڵ کۆمەڵێک هاوڕێی دانیشتبوو و پێ‌ی گوتن: خۆزگە بە شتێک بخوازن کەخودای گەورە پێتان ببەخشێت.
یەکێکیان گوتی: خۆزگە ئەو خانووە پڕ لە زێڕ بوایە و لە پێناو خودای گەورە بمبەخشیبایە.
ئینجا عومەری کوڕی خەتاب (خودا لێ‌ی ڕازی بێت) جارێکی دیکە فەرمووی: خۆزگە بە شتێک بخوازن کە خوای گەورە پێتان ببەخشێت.
پیاوێکی دیکە گوتی: خۆزگە ئەو خانووە پڕ لە گەوهەر و یاقووت و مرواری بوایە و لە پێناوی خودای گەورە بمبەخشیبایە.
ئینجا جارێکی دیکە عومەری کوڕی خەتاب فەرمووی: خۆزگە بە شتێک بخوازن کە خوای گەورە پێتان ببەخشێت.
هاوڕێکانی گوتیان: نازانین چی بڵێین ئەی پێشەوای ئیمانداران!!
عومەری کوڕی خەتاب (خودا لێ‌ی ڕازی بێت) گوتی: بەڵام من خۆزگە بە پیاوی ئازا و بوێر دەخوازم وەکو (ئەبو عوبەیدەی کوڕی جەڕاح).
بەڵێ پێشەوای ئیمانداران خۆزگەی بە ماڵ و سەروەت و سامان نەخواست چونکە دەیزانی سەرمایەی ڕاستەقینەی ئیسلام پیاوە ئازا و دلێر و بوێرەکانن پیاوانێک لە نموونەی ئەبو عوبەیدەی کوڕی جەڕاح.
بۆیە کامەمان خۆزگەکەی پێشەوای ئیمانداران عومەری کوڕی خەتاب بەدی دێنین بە تایبەت لەو سەردەمەدا کە (بەداخەوە) پارە و پوول زۆرینەی پیاوەکانی لە پیاوەتی خستووە!.
با پێشەوای ئیمانداران عومەری کوڕی خەتاب بشزانێت کە زۆرینەی هاوڕێباز و شوێنکەوتەی ئایینە پاکەکەی ئیسلام ئەوڕۆ جیاواز لە خۆی خۆزگە دەخوازن تەنانەت بەشێکی زۆریشیان دینەکەیان هەڕاج دەکەن لە پێناو پارە و پوول!!.